Хаваслӑ хыпар! Ҫӗнтерӳ! Ҫӗнтерӳ!

                                   Ҫут ҫиҫӗмӗн ҫиҫрӗ тӑван ҫӗршыв ҫийӗн.

                                   Ҫынсем пӗр-пӗрне саламлаҫҫӗ хӗрӳ

                                       Урамсенче савӑнӑҫ, юрӑ сассийӗ.

       1941-мӗш ҫулхи июнӗн 22-мӗшӗ… Тул ҫутӑлса килнӗ вӑхӑтра фашистла Германи ҫарӗсем пирӗн аслӑ Тӑван ҫӗршыв ҫине ултавлӑн, ним систермесӗр вӑрӑ-хурахла тапӑнса кӗнӗ. Аслӑ Аттелӗх вӑрҫи пуҫланнӑ.  1418 куна пынӑ хаяр ҫапӑҫура пӗтӗм совет халӑхӗпе пӗрле пирӗн ентешсем те паттӑррӑн ҫапӑҫнӑ.  Треньел ялӗнчен иртнӗ Аттелӗх вӑрҫине 113 ҫын тухса кайнӑ. Вӗсенчен каялла 64 ҫын таврӑнайман, вӑрҫӑра паттӑрла пуҫ хунӑ, 59-ӑн таврӑннӑ.

        Вӑрҫӑ… Ҫак хӑрушӑ сӑмах камӑн чунне ыраттарман, камӑн чунне пӑшӑрхантарман пулӗ. Мӗн чухлӗ ҫын ӗмӗрне, ҫамрӑксен вӑхӑтсӑр шӑпине татрӗ-ши, мӗн чухлӗ икӗ чӗрен юратӑвне уйӑрчӗ-ши.

     Ҫу уйӑхӗн 8-мӗшӗнче Треньел ялӗнчи шкул умӗнчи Аслӑ Аттелӗх вӑрҫинче пуҫ хунӑ ентешсене асӑнса лартнӑ палӑк умне митинга  халӑх йышлӑ пуҫтарӑнчӗ. Кӑҫал Аслӑ Ҫӗнтерӗве – 73 ҫул. Уяв ячӗпе шкул директорӗ Кошкина И.А., Тӑрӑн ял администрацийӗн пуҫлӑхӗ Михеев К.Ф., Патӑрьел район администрациӗн пуҫлӑхӗн ҫумӗ Кузнецов Л.В. , полиции сотрудникӗ Фролова О.Ю. саламларӗҫ. Уяв программине шкул-ача сад коллективӗн, вӗренекенсен, садик ачисен  юрри-ташшисем  пуянлатрӗҫ.  Фронтра ҫӗнтерӳшӗн ҫапӑҫса пуҫ хунисене асӑнса пӗр минут шӑп тӑчӗҫ. Тыл ветеранӗсем  палӑк умне чӑрӑш лӑссисенчен хатӗрленӗ гирлянда хучӗҫ. Уяв «Вилӗмсӗр полк» акципе вӗҫленчӗ.

          Хаяр вӑрҫӑ вӗҫленни 73 ҫул ҫитрӗ. 73 ҫул эпир мирлӗ пурнӑҫпа пурӑнатпӑр. Тайма пуҫ сире, вӑрҫӑпа тыл ветеранӗсем.

Ветерансем, саламлама парсамӑр ирӗк

сунатпӑр сывлӑх, чунӑра телей.

Вӑй-халӑр пур чухне утсамӑр ҫирӗп.

Сире курса йӑл култӑрччӗ хӗвел.