Треньел шывӗ тарӑн шыв,
Чи тарӑнни пилӗкрен.
Треньел хӗрӗ сарӑ хӗр,
Сарӑ ҫӱҫӗ пилӗкрен, -
шӑрантарчӗҫ ҫу уйӑхӗн юлашки вырсарни кун Треньелсем. Йӑлана кӗнӗ йӗркепе кашни урамран чӑваш тумӗ тӑхӑннӑ ватӑсемпе пӗрле ҫамрӑксем, ачасем пӗр ял вӑййине пуҫтарӑнчӗҫ. "Ҫамрӑклӑх" утравӗнче вӑйӑ картине тӑрса чӑвашсен вӑйӑ юррисене юрларӗҫ, ташшисемпе тӗлӗнтерчӗҫ.
Уява уҫма Тӑрӑн ял тӑрӑхӗн пуҫлӑхӗ Константин Михеев, Треньелӗнчи пуҫламӑш шкул-сад директорӗ Ирина Кошкина, Патӑрьел район администрацийӗн социаллӑ аталану, туризм тата вырӑнти самоуправлени органӗсемпе ӗҫлекен тӗп специалист-эксперчӗ Полина Логунова, Треньел культура ҫурчӗн культорганизатӑрӗ Елена Сорокина хутшӑнчӗҫ. Ял хӑтлӑхӗпе илемӗшӗн тӑрӑшакансене хисеп хучӗпе чысларӗҫ. Уяв ялавне ялти хисеплӗ ватӑсем ҫӗклерӗҫ.
Юрӑ-ташӑ концертне музыка вӗрентекенӗ Наталия Лаврентьева ертсе пычӗ. Шкул коллективӗпе пӗрле ял халӑхӗ хӑйӗн пултарулӑхне кӑтартса пачӗ. Ытти ҫулсенчи пекех кашни касра пурӑнакансем хӑйсен номерӗсемпе паллаштарчӗҫ. "Кай, кай, Ивана" спектакльти пӗр сыпӑка сцена ҫинче выляса кӑтартса Хир урамӗнче пурӑнакансем куҫса ҫӱрекен кубока хӑйсен аллинчех хӑварчӗҫ (иртнӗ ҫулхи уявра та кубок Хир кассинче пурӑнакансенче пулнӑ).
Каспа кас хушшинчи командӑсем ҫӑмӑл атлетика эстафетинче ӑмӑртрӗҫ. Сӑрт урамӗнче пурӑнакансен командине ҫитекенни пулмарӗ. Гиря йӑтассипе Михаил Фролов, алӑ вӑйӗ виҫессипе арҫынсем хушшинче Ярослав Логинов, хӗр арӑмсем хушшинче Наталия Никитина вӑйлисем пулчӗҫ.
Уява пуҫтарӑннӑ халӑха суту-илӱ речӗ хӑй патне йыхӑрчӗ. Ача-пӑча тутлӑ ҫимӗҫпе сӑйланчӗ, аслисем шашлык-шӱрпе тутанчӗҫ. Кӑмӑл тӑвакансем батут ҫинче сиксе савӑнчӗҫ.
Уяв сӗмӗ ял хушшинче каҫченех тӑсӑлчӗ.